Ranieri: Ekipi ka gjetur veten

Claudio Ranieri është i kënaqur pas fitores 2-0 të Juventusit kundër Chievos. “Ekipi e ka gjetur veten”. Ajo e bardhezinjve ka qenë fitorja e grupit, por edhe e individualiteteve, Alessandro Del Piero mbi të gjithë. “Lojtarët janë në gjendje të mirë dhe kanë dëshirë të luftojnë. Më pas brenda grupit është kampioni që del mbi të tjerët dhe Del Piero në këtë kontekst është i paarritshëm. Aleks është kapiteni dhe lideri i kësaj skuadre, ka marrë mbi supe shumë përgjegjësi në një moment të vështirë dhe tani po vlerësohet me gola. Jam i gëzuar, pasi kemi replikuar fitoren e arritur në Bernabeu, e cila rrezikonte të na hiqte përqendrimin”,- është shprehur Ranieri. Edhe Tiago duket se është kthyer në të njëjtat nivele kur luante me Lyonin: “Tani ai është përshtatur me mekanizmin e 4-4-2-it, një skemë kjo me të cilën nuk ishte mësuar sepse ka luajtur gjithmonë në një ekip ku përdoreshin tre mesfushorë”,- ka shpjeguar trajneri juventin. Domethënë, gjithçka mirë, por Ranieri nuk është euforik: “Sezoni është akoma i gjatë dhe gjithçka do të vendoset në pranverë. Interi është favorit për numrin dhe cilësinë e lojtarëve që ka në dispozicion bashkë me Milanin, që nuk luan në Champions League”,- ka përfunduar tekniku Ranieri.