“Ndaj Napolit pashë një Juventus të madh”

“Shokët e mi të skuadrës janë treguar shumë të zotët, me Napolin kanë fituar një betejë të vërtetë”. Gigi Buffon përgëzon Juventusin, që të mërkurën në mbrëmje ka fituar me penallti kualifikimin në gjysmëfinalen e Kupës së Italisë. “Që në momentin e parë që kam ardhur këtu – ka shtuar Buffon – nuk kam arritur asnjëherë ta fitoj këtë trofe dhe do të më pëlqente shumë që ta arrija këtë vit. Dua t’i bëj përgëzimet e mia të gjithë skuadrës për rezultatin që kanë arritur në këtë sfidë. Kanë dhënë maksimumin për fitoren dhe i gjithë mundimi i tyre u vlerësua me kualifikimin”. Buffon ka bërë një vlerësim për Manniger, i cili nuk e ka zhgënjyer edhe kësaj here: “Ka qenë vendimtar në penalltinë e Lavezzit”. Ndërkohë, portieri austriak, Aleks Manninger, falënderon Buffonin për fjalët pozitive të shprehura në drejtim të tij: “Gigi është numri 1 më i fortë në botë dhe unë jam shumë i kënaqur që jam zëvendësuesi i tij. Nga ana tjetër, jemi të gjithë të kënaqur që arritëm të kualifikoheshim – ka vazhduar – dhe që nuk pësuam asnjë gol gjatë ndeshjes. Skuadra ka qenë e bashkuar dhe ka zhvilluar një lojë tipike të Juventusit”.