Del Piero, datëlindja dhuron 250 golat

Në përfundim të sfidës së fituar kundër Chievos, Alessandro Del Piero është më i buzëqeshur se kurrë. Në ditën e 34-vjetorit të tij, kapiteni i Juventusit i ka dhuruar vetes një tjetër paraqitje të shkëlqyer në fushën e lojës, të finalizuar me një tjetër gol fantastik, përsëri me goditje dënimi. “Jam shumë i lumtur, besoj se dallohet qartë, qoftë për golin dhe paraqitjen personale, ashtu si dhe për fitoren e skuadrës, që për mua ishte objektivi kryesor. Lodhja është e madhe, pasi kemi luajtur shumë ndeshje radhazi, por kjo i shton edhe më shumë vlerat e këtij grupi”, thekson Alessandro Del Piero. Mbi temën e ndeshjeve të shumta, Juventusi nuk do të ketë shumë ditë pushim, pasi të enjten e ardhshme e pret sfida e radhës në kampionat kundër Genoas, sepse të dielën, stadiumi “Olimpico” i Torinos do të shndërrohet në strehën që do të presë ndeshjen e regbisë ndërmjet Italisë dhe Australisë. “Fillimisht do t’i gëzohemi këtij suksesi ndaj Chievos dhe më pas do të mendojmë për Genoan. Padyshim që do të jetë një ndeshje e fortë kundër një kundërshtari që po kalon një formë të shkëlqyer, por si në çdo sfidë, objektivi ynë do të jetë fitorja”, përfundon kapiteni i Juventusit.