Kapiteni juventin shënon golin e radhës nga goditja e dënimit, festuar ditëlindjen në mënyrën më të mirë.Edhe një herë tjetër protagonist, edhe në Chievo, në javën e triumfit të arritur në Madrid, Alessandro Del Piero, në ditën e 34- vjetorit të tij, i hap rrugën fitores së Juventusit. E bën këtë me anë të një goditjeje dënimi, një nga të tijat, që kurorëzon një provë të rëndësishme, e nënvizuar nga duartrokitje të gjata të publikut vendës në momentin e daljes së kapitenit bardhezi nga fusha. Një Del Piero i lumtur dhe i kënaqur, që komenton në këtë mënyrë momentin pozitiv që po kalon: “Jam i lumtur, kemi fituar, kam shënuar, çfarë mund të kërkoj më shumë? E rëndësishme është të vazhdojmë në këtë rrugë në një periudhë të rëndësishme si kjo që po përjetojmë tani”. E pyesin se pse ka dashur ta shtyjë golin e tij numër 250 me fanellën bardhezi duke e lënë Iaquintan të godasë penalltinë: “Kemi folur, mund ta kisha gjuajtur edhe unë, por e kuptova që Vincenzo kishte dëshirë të shënonte dhe ia kam lënë atij me gjithë qejf. Jam i lumtur për të”. Juventusi vazhdon të fitojë nën shenjën e Aleks Del Pieros. Edhe dje kapiteni ka realizuar një gol të shkëlqyer, duke konfirmuar, në rast se do të ishte e nevojshme, se po kalon një moment perfekt të gjendjes së tij fizike dhe teknike. Del Piero e ka shpjeguar kështu momentin që po kalon. Tashmë nuk shënon më në aksion, por vetëm nga goditjet e dënimit…: “Eshtë shqetësimi im më i madh”. Duke parë gjendjen e shkëlqyer që po kalon do të doje të ktheheshe 20 vjeç apo është më mirë tani? “Do të rikthehesha, kështu do të mund të luaja jo vetëm edhe 6-7 vite të tjera siç kam ndërmend të bëj, por edhe 20. Përveç shakave, koha të ndihmon dhe të bën më të pjekur, pa dyshim. Jam tepër i kënaqur me momentin që po kaloj”, - ka thënë Del Piero. Ndërsa mbi ndeshjen: “Kjo është një fitore e rëndësishme, sepse u jep vazhdimësi rezultateve pozitive të arritura deri tani nga Juventusi”. Në momentin e golit është mbuluar nga shokët e ekipit. “E ndienim shumë këtë ndeshje, donim të fitonim, gëzimi ishte për avantazhin e arritur”. Por sa ka mësuar Del Piero nga goditjet e dënimit nga paraardhësit e tij si Sivori dhe Platini? “I adhuroja dhe i ëndërroja. Kjo më ka ndihmuar, ashtu si prindërit e mi që më kanë dhënë këto aftësi. Dhe në fund duhet shumë stërvitje”,- ka përfunduar kapiteni bardhezi.
Nuk ka komente:
Posto një koment