Alessandro Del Piero është shpallur dje futbollisti më i mirë italian, kurse Zlatan Ibrahimovic ka fituar çmimin futbollisti i huaj dhe sigurisht më i miri në absolut dhe Cesare Prandelli, trajneri më i mirë. Janë këto çmimet kryesore të sezonit 2007-2008 të dorëzuara pasditen e djeshme në Milano nga shoqata e futbollistëve, në një mbrëmje tashmë të bërë traditë, pas përfundimit të fazës së parë të çdo kampionati. Oscari si gjyqtari më i mirë i është dhënë Roberto Rosettit, i cili së fundi është vlerësuar edhe si arbitri më i mirë në botë për 2008-ën. Giorgio Chiellini ka fituar çmimin si mbrojtësi më i mirë i sezonit, kurse Marek Hamsik vlerësohet si i riu më i talentuar. Nuk kishte dyshime mbi çmimin e portierit më të mirë, juventini Gianluigi Buffon. Risia e këtij sezoni ishte edhe votimi për golin më të bukur të vitit, çmim që vendoset nga votat e tifozëve, i cili i ka shkuar Zlatan Ibrahimovicit dhe në përfundim, Oscari për lojtarin më të dashur nga publiku italian nuk kishte sesi të mos shkonte në duart e kapitenit të Juventusit, Alessandro Del Piero.
Nuk ka komente:
Posto një koment