Juventus e kërkon, tashmë Behrami kushton 20 mln euro

West Ham rrit çmimin e kartonit të mesfushorit 23-vjeçar. Paraqitjet e mira të Valon Behramit në Premiershipin anglez kanë sjellë interesimin e jashtëzakonshëm të skuadrave italiane për lojtarin. Por, West Ham reagon, duke e hequr kosovarin me pasaportë zvicerane nga merkato. Sapo Juventusi hyri në garën për të siguruar shërbimet e 23-vjeçarit, klubi londinez vendosi te emri i Behramit etiketën "i pashitshëm". Një mënyrë me të cilën klubi ku punon, si trajner Gianfranco Zola kërkon të rrisë çmimin e kartonit të mesfushorit, që në lojën në krah është një prej lojtarëve më të mirë në botë. Vetëm pak kohë më parë, West Ham refuzoi një ofertë prej afro 20 milionë eurosh (më parë flitej për një shifër mbi 10 milionë euro), nga një klub elitar anglez. Kjo është arsyeja përse ata nuk mendojnë të fillojnë bisedimet me Juventusin. Drejtuesit e klubit bardhezi, që në këtë sezon duket rivalja kryesore e Interit në garën për titullin kampion në Serinë A, shpresonin që të paguanin rreth 7 milionë euro për Behramin, i cili u largua nga Lazio gjatë merkatos së verës, duke shfrytëzuar rregulloren e FIFA-s.