Lippi: Amauri? Për të pyesni Juventusin

“Amauri? Pse më pyesni mua? Pyesni më mirë Juventusin”. Marcello Lippi është i lodhur me “telenovelën” Amauri dhe në një intervistë të dhënë për “Sky” është shprehur: “Amauri është një lojtar i mirë, si shumë të tjerë. Por unë përgjigjem vetëm për futbollistët italianë”. Por është e pamundur që të mos flitet më për të ashtuquajturën “telenovelë”, duke pasur parasysh se jemi në prag të ndeshjes miqësore Itali-Brazil. Kontestimet – Megjithatë, Lippi do të përballet me këtë çështje të shtunën, kur të grumbullojë lojtarët që do të zbresin në fushë për miqësoren me brazilianët, në program për të martën në “Wambley”. Përsa i përket sfidës, Lippi ka disa kontestime: “Kanë menduar të tjerët për ta bërë interesante këtë ndeshje, duke bërë krahasime që nuk kanë lidhje fare më këtë punë – është shprehur Lipi, duke iu referuar polemikave në lidhje me çështjen ‘Batisti’. – Është një ndeshje që ka shumë prestigj teknik, por më vjen shumë keq që do të luhet ditën e martë. Do të përballen dy nga kombëtaret më të forta në botë, me protagonistë absolutë, dhe të luhet pas 48 orësh nga kampionati nuk ka asnjë kuptim. Sfida do të humbasë bukurinë. Megjithatë, mund të them se ishte e nevojshme që të bëhej kështu”. Pa surpriza – Përsa i përket të grumbulluarve, ish-trajneri i Juventusit ka sqaruar se nuk do të ketë asnjë surprizë. “Itali-Brazil nuk është një ndeshje në të cilën mund të bësh eksperimente, ndaj pres një betejë të ashpër, pavarësisht se është miqësore. Jam në kontakt me Rossin, i cili po përpiqet të rikuperohet. Nuk besoj se do të ketë eksperimente, sepse nuk kam ndërmend të grumbulloj në formacion lojtarë që s’mund të japin maksimumin. Në Romë flasin për Brighin, në Bergamo për Floccarin, gjithandej flasin për një lojtar që është gati për Kombëtaren dhe të them të drejtën, më bëhet qejfi që ndodh kështu. Kombëtarja italiane duhet të jetë një ëndërr për të gjithë futbollistët tanë, por nuk mund t’i thërrasim të gjithë meqenëse kanë bërë një paraqitje të mirë në një ndeshje. Nuk është kjo mënyra që ndërtohet një skuadër e mirë dhe e fortë. Nëse këta lojtarë do të kenë vazhdimësi dhe do të japin rezultate gjatë të gjitha sfidave, patjetër që do të jenë pjesë e kombëtares në të ardhmen. Unë dua të kem një skuadër sa më të fortë dhe këtë gjë mund ta arrij vetëm duke grumbulluar më të mirët”.