Juve arrin marrëveshje me Diegon?

"Tuttosport" njofton se Diego është pajtuar të nënshkruajë një kontratë katër vjeçare me Juventusin me ç’rast do të fitojë një vlerë mesatare prej katër milionë eurosh për sezon (3.8 milionë në sezonin e parë dhe 4.6 milionë në të fundit). Presidenti i Juventusit, Giovanni Cobolli Gigli, para disa ditësh zbuloi se bardhezinjtë do ta përforcojnë skuadrën për sezonin e ri, ndërsa një ‘plejmejker’ ka qenë nevojë e domosdoshme e Zonjës së Vjetër. E vetmja gjë e mbetur tani është marrëveshja me skuadrën e Werder Bremenit, me ç’rast Bianconerët do të mundohen t’i bindin gjermanët të heqin dorë nga ylli brazilian.

“Giovinco nuk ikën”

“Nuk arrij të kuptoj se pse e ardhmja e Giovincos duhet të jetë larg Juventusit. Ai është një pasuri e kësaj skuadre dhe padyshim që nuk do të largohet nga Torino”. Kjo është deklarata e trajnerit të Juventusit, Claudio Ranieri, kundër gazetarëve të cilët këmbëngulin se nga sezoni i ardhshëm, talenti bardhezi mund të huazohet, apo akoma më shumë mund të përdoret si një mjet shkëmbimi që drejtuesit torinezë të sjellin në skuadër disa ndër objektivat e planifikuar nga klubi për përforcimin e skuadrës. Në ndeshjet e fundit, Giovinco ka qenë një ndër katalizatorët e Juventusit për të marrë fitoret kundër Bolognas dhe Romës, ashtu siç priten të jenë edhe Camoranesi, Marchisio e Legrottaglie për sprintin final të kampionatit, të cilët do të rikthehen në dispozicion, pas pauzës së përfaqësueseve.

Juventus do të përfshijë Iaquintan në ofertën për Hamsik

Juventus është i gatshëm të përfshijë sulmuesin Vincenzo Iaquinta në ofertën për të marrë yllin e Napolit, Marek Hamsik. Gazzetta dello Sport shkruan se Juventusi e ka marrë me shumë seriozitet mundësinë për të transferuar mesfushorin sllovak. Bianconerët synojnë të ofrojnë 14 milionë funte dhe në ofertë të përfshijnë njërin, Iaquinta ose Rafaelle Palladino, si shkëmbim për Hamsik, të cilit do t’i ofrohet marrëveshje katërvjeçare.

Pellisier pranon forcën e “Zonjës së Vjetër”

Dy fitore radhazi për të karikuar një skuadër, e cila pas fazës së parë dukej e destinuar për të zbritur në Serinë B. Chievo është rikthyer të buzëqeshë, pasi pas sukseseve me Lazion dhe Palermon, tashmë verdheblutë kanë lënë pas zonën e ftohtë të renditjes dhe shohin me shumë optimizëm drejt mundësisë së qëndrimit në Serinë A. Gjithsesi, djemve të Mimmo Di Carlos, të dielën më datë 5 prill do u duhet të përballen në Torino me Juventusin, në një sfidë e cila për Pellisierit është e humbur që në nisje, si rrjedhojë e forcës së bardhezinjve. “Objektivi ynë është qëndrimi në Serinë A, ndërkohë që Juventusi synon titullin. Ndonëse objektivat janë pak a shumë të ngjashëm, pasi titulli ynë është qëndrimi në Serinë A, mendoj se Juventusi është një skuadër shumë e fortë, që do të na vërë në vështirësi. Për ne do të jetë e vështirë të fitojmë në Torino, por gjithsesi, do të japim maksimumin tonë, duke shpresuar në mrekullinë e një pike”.

Juventusi është duke planifikuar që në afatin kalimtar veror ta transferojë në Torino sulmuesin e Sampdorias, Antonio Cassano, ndërsa ikona bardhezi Alessandro Del Piero thotë se nuk e ka frikë konkurrencën. “Nuk mendoj se do të ketë konkurrencë në aspektin negativ, megjithatë karriera ime futbollistike më tregon se nuk duhet t’ia kem frikën ardhjes së Cassanos ose ndonjë lojtari tjetër”. “Cassano dhe unë luajmë në pozita të ndryshme dhe mendoj se do të ishim shumë të suksesshëm së bashku. Derisa vijnë në skuadër lojtarë të mëdhenj si Cassano, atëherë gjithçka do të shkojë mirë”, është shprehur Del Piero për “La Repubblica”.

“Do presim një kampion të madh”

Nga një blerje të madhe çdo sezon për ta fuqizuar sa më shumë skuadrën. Në këtë mënyrë, dalëngadalë do i japim jetë një cikli fitues”. Është pikërisht ky, projekti i administratorit bardhezi, Jean-Claude Blanc, i cili nuk flet për shifra, por për strategjitë afatgjatë që do ndjekë Juventusi në të ardhmen. Sa për fillim, drejtuesi bardhezi, bën të ditur se sivjet do blihet vetëm një lojtar me peshë për të zëvendësuar çekun Pavel Nedved, i cili në fund të sezonit do të braktisë përfundimisht futbollin. Në listën e gjatë të lojtarëve me peshë të drejtuesit bardhezi, i pari qëndron David Silva, agjenti i të cilit gjatë këtyre ditëve ndodhet në Torino. Ndërkohë Blanc, si për të dalë nga amullia e merkatos, i kujton skuadrës së tij se duhet të bëjë të pamundurën për t’i marrë titullin Interit: “Deri sa matematika të na mbajë në lojë, ne do të vazhdojmë të luftojmë – ka thënë Blanc. Tani po presim me padurim përpalljen direkte me Interin”. Administratori bardhezi ka ilustruar edhe të dhënat ekonomike të klubit bardhezi, të cilat janë fuqizuar shumë nga pjesëmarrja e sivjetshme e “Zonjës së Vjetër” në Ligën e Kampioneve: “Bilanci i Juventusit është i shëndetshëm, shumë shpejt do fillojmë të investojmë te lojtarët e rinj – ka përfunduar Blanc. Synimi ynë kryesor është të zbulojmë sa më shumë të tillë, duke u treguar të gjithëve që me këtë politikë mund të fitohet shumë. Ne besojmë se kemi gjetur rrugën e duhur të suksesit”.

Edhe Toni kundër Amaurit

Pas mesfushorit të Milanit, Gattuso, i cili disa javë më parë kishte deklaruar se nuk e shikonte me sy të mirë përfshirjen e Amaurit tek kombëtarja italiane edhe Luca Toni, ka dhënë mendimin e tij lidhur me këtë çështje. “Unë nuk do të isha dakord, - ka shpjeguar sulmuesi i përfaqësueses së kaltër që luan për Bayernin e Mynihut. Në Itali kemi shumë lojtarë të shkëlqyer. E kam fjalën për Marco Di Vaion dhe Giampaolo Pazzinin. Dy lojtarë që nuk kanë probleme me pashaportën ose me kombësinë”. Pra, janë të shumtë futbollistët italianë që nuk janë dakord të shohin Amaurin me fanellën “axurre”. Lojtari, sigurisht, do të ishte një ndihmë më shumë për kombëtaren, në veçanti për fantazinë dhe cilësinë e veprimeve të tij, që duhet thënë mungojnë pak në formacionin e përbërë nga 11 italianë. Tani i takon vetëm sulmuesit të Juventusit të vendosë se çfarë do të bëjë në të ardhmen.

Buffon: Amauri i mirëpritur, Cassano detyrë e Lippit

Portieri i kombëtares “axurre” pret me krahët hapur sulmuesin brazilian

Në qendrën stërvitore të Italisë, e cila po përgatitet për ndeshjet eliminatore të Kupës së Botës kundër skuadrave të Malit të Zi dhe Irlandës, njeriu i ditës është portieri i Juventusit, Gigi Buffon. Ai ka prekur tema të nxehta, duke nisur nga fantazisti i Sampdorias Antonio Cassano dhe shoku i tij i skuadrës Amauri e deri te lufta për titull në Serinë A.

CASSANO ‑ “Do të ishte shumë i dobishëm për ne ‑ ka thënë portieri që deri tani ka zhvilluar plot 90 ndeshje me fanellën e kombëtares italiane në lidhje me sulmuesin e Sampdorias, por ai që vendos për këtë është Lippi. Nuk besoj se portat e kombëtares janë të mbyllura për ndonjë lojtar. Cassano në finalet e Evropianit luajti mirë dhe me formën e shkëlqyer që po kalon, do të ishte shumë i dobishëm për skuadrën. Por e përsëris edhe një herë tjetër për këto gjëra vendos vetëm trajneri”.

ÇËSHTJA AMAURI ‑ Buffoni prek edhe çështjen Amauri, duke hapur dyert e përfaqësueses për shokun e tij të skuadrës dhe duke dalë kundër mendimeve që janë shprehur disa ditë më parë nga mesfushori i Milanit Gennaro Gattuso dhe nga sulmuesi i Bayernit të Mynihut Luka Toni: “Nëse vendos të bëhet pjesë e grupit të axurrëve, do të jetë i mirëseardhur. Nëse na ndihmon të përmirësohemi, nuk do të ketë asnjë problem. Nëse vendos të luajë për Italinë, do ta bëjë sepse duhet ta ndiejë në zemër dhe për mua është i mirëseardhur nëse e ndien këtë. Shokët e skuadrës që kanë folur ndryshe ndoshta janë mërzitur sepse pritja po bëhet shumë e gjatë…”, ka deklaruar portieri bardhezi.

JUVENTUSI ‑ Portieri i Italisë më pas i kthehet edhe kampionatit dhe Juventusit të tij. “Mundësia jonë e vetme për të marrë kampionatin varet nga përballja direkte që do të zhvillojmë më 19 prill me Interin në fushën tonë. Mourinho është serioz dhe inteligjent, por nganjëherë e kalon kufirin. Mbi kolegët nuk mund të hidhet baltë”, ka thënë Buffon. Më pas ai i kthehet sërish temës së Cassanos, por në këndvështrimin e juventinit: “Për të fituar nevojiten kampionë, prandaj Cassano mund të jetë një lojtar i mirëpritur te ne. Sigurisht që do të na ndihmonte të përforcoheshim akoma më shumë për sezonin e ardhshëm”.

REDUKTIMI I RROGËS – Një temë tjetër e përfolur nga Buffon është reduktimi i pagave. Portieri është futbollisti më i paguar te Juventusi me 5.5 milionë euro në sezon dhe në një periudhë krize, të gjitha skuadrat kërkojnë të bëjnë disa shkurtime, por Buffon nuk duket i gatshëm të bëjë diçka të tillë, duke u përgjigjur shkurt: “Besoj se përfitoj atë që meritoj”.

Iaquinta: Amauri “axurr”? S’ka problem

Sulmuesi bardhezi “fton” shokun e tij të skuadrës te Juvja edhe në kombëtare: Jam gati të luftoj me të gjithë

Nëse jam mirë nuk ndihem inferior ndaj askujt, po përjetoj një periudhë shumë të bukur. Po luaj rregullisht, nuk kam probleme fizike dhe jam mirë në aspektin psikologjik. Tani dua të paraqitem mirë edhe me kombëtaren”. Vincenzo Iaquinta po përjeton një moment të artë me Juventusin dhe kërkon të vazhdojë kështu edhe në dy ndeshjet e ardhshme të kombëtares, duke qenë gati ndaj Malit të Zi dhe Republikës së Irlandës, ndeshje të vlefshme për kualifikimin në “Botërorin 2010″. Roli për juventinin nuk është një problem. “Te Juvja luajmë me dy sulmues, në kombëtare jam aktivizuar edhe si anësor. Megjithatë, nëse luaj si sulmues i parë, mund të luftoj për një fanellë titullari. Nuk kam luajtur asnjëherë me Italinë si qendërsulmues që nga fillimi, por nuk është një problem: te Udineseja e kam bërë për 7 vjet dhe ai është roli që më përshtatet më shumë”. Ka pasur momente të mira dhe të tjera jo shumë të mira edhe për shkak të dëmtimeve. “Kur isha te Udineseja, - tregon Iaquinta, - nisesha si titullar edhe nëse mungoja në ndonjë stërvitje. Te Juvja është ndryshe, ka kampionë të mëdhenj. Tani po stërvitem mirë, kam luajtur 5 ndeshje radhazi dhe nuk dua të ndaloj më”. Ai në kombëtare është, Cassano e Amauri jo. Ose jo akoma. Pra, Iaquintas “i afrohen” dy “konkurrentë” fantazëm te Juvja (njëri është që tani, tjetri ndoshta..), dhe në mënyrë hipotetike me fanellën “axurre”, të cilët kur mungojnë shkaktojnë polemika: “Duhet të vendosë vetë Amauri me Lippin, - shpjegon Iaquinta. Duhet të jetë ai që vendos ç’të bëjë dhe Lippi duhet ta grumbullojë. Tani po flitet shumë dhe ndoshta ai ka gabuar në ndonjë përgjigje. Është një lojtar i madh, nëse vjen këtu nuk ka asnjë problem për mua. Unë jam gati të luftoj me të gjithë për një vend. Cassano? Është një lojtar i rëndësishëm, por vendos Juvja se cilin duhet të blejë.”

Agjenti i David Silvës, në Torino

Jose Segui, menaxheri i sulmuesit të Atletico Madridit, Sergio Aguero, dhe mesfushorit të Valencias, David Vila, ka mohuar se ka zhvilluar një takim me presidentin e Interit, Massimo Moratti, dhe që ka diskutuar me të për të ardhmen e futbollistit argjentinas: “Isha në Torino, jo në Milano dhe atje kam qenë për punë të tjera”. E meqenëse David Silva është një lojtar që i intereson Juventusit, prezenca e tij në Torino lë shumë për të kuptuar dhe mbase është pikërisht Silva, blerja e madhe që Blanc deklaroi.

Iaquinta: Gati të vë bast për Juven

Sulmuesi i Juventusit, Vincenzo Iaquinta, ka fituar një vend titullari në ekip gjatë këtyre javëve të fundit pas dëmtimit të Amaurit dhe zënkës së David Trezeguet me trajnerin Claudio Ranieri. Ai shënoi një dygolësh vendimtar në fundjavën e kaluar, teksa bardhezinjtë shkatërruan Romën 4-1 në stadiumin “Olimpico”, duke mbajtur gjallë shpresat për fitimin e titullit kampion të Serisë A. “Unë jam gati të vë bast se ne do ta fitojmë kampionatin" - ka thënë Iaquinta. Kemi besim dhe do të vazhdojmë të kemi deri në fund. Ky është mentaliteti ynë, e kemi në gjen si skuadër”. Mbi të gjitha, ky është një nga momentet më kulmor për vetë sulmuesin në planin personal: “Përsa më takon mua, unë jam i gatuar kështu: nëse luaj, ia dal gjithmonë të shënoj. Tani s’është koha për kontradikta. Unë e kam lënë pas atë ‘shpërthim’ që pata në Catania. Do të thosha se thjesht isha i inatosur, pasi kisha kaluar një kohë të gjatë në stol. Një kryengritje e tillë mendoj se është e natyrshme të ndodhë për çdo futbollist që dëshiron të luajë vazhdimisht. Ndihem më mirë tani dhe mund të them se e nisa me këmbë të mbarë ndeshjen e pestë në Romë”, ka vazhduar ish-lojtari i Udineses. Megjithatë, ai nuk ka ndërmend të ndalet me kaq: “Ranieri ka besim tek unë dhe mendoj se po ia shpërblej. Kurrë nuk u kam vënë veshin zërave që kërkonin largimin tim. E ardhmja ime është këtu… Kam ende për të dhënë dhe për të shënuar me Juventusin”. Luciano Spalletti, trajneri i Romës, disa kohë më parë ishte shprehur se problemi me Iaquintën është se nuk shënon gola aq sa duhet. Tani, tekniku i verdhekuqve me siguri që është penduar për atë deklaratë. Të shtunën, sulmuesi italian shënoi dy herë kundër Romës së drejtuar nga ish-trajneri i tij, duke marrë edhe një farë revanshi personal. Tashmë, ai po bëhet sulmuesi më stabël i Juventusit, pasi ka shënuar gjashtë gola gjatë nëntë ndeshjeve të këtij sezoni.

Për Cobolli Giglin, sfida Juve-Inter do jetë kyçe

Interi iu kundërpërgjigj fitores shkatërruese që Juve arriti me Romën, me një sukses bindës përballë ekipit të vendit të fundit, Regginës. Kështu mbajti distancën prej shtatë pikësh në kreun e kampionatit italian. Trajneri i zikaltërve, Jose Mourinho, i bëri komplimente “Zonjës së vjetër” pas përballjes me kryeqytetasit, pasi bardhezinjtë vazhdojnë të mos dorëzohen. “Nëse ka thënë me të vërtetë ashtu, atëherë është një vlerësim i rëndësishëm që i bëhet Juves" - ka thënë presidenti i klubit torinez, Giovanni Cobolli Gigli. Objektivi ynë është të kualifikohemi për në Ligën e Kampionëve dhe që kjo gjë të ndodhë rregullisht në vitet në vazhdim. Përsa i takon kampionatit, do të mundohemi të mbledhim sa më shumë pikë, siç bëmë në ndeshjen përballë Romës. Ne do të na duhet t’i fitojmë të gjitha ndeshjet e mbetura, nëse synojmë titullin. Pastaj, përballja me Interin në Torino do të jetë vendimtare”.

Buffon: Interi e meriton pozitën e parë

Interi gjendet në krye të tabelës në Serie A me shtatë pikë diferencë nga Juventusi, ndërsa portieri bardhezi, Gianluigi Buffon, pohon se zikaltrit e meritojnë vendin e parë në tabelë. “Tash për tash Interi meriton të jetë i pari, sepse edhe në momentet e vështira ata arritën t’i fitojnë ndeshjet me lehtësi. Ashtu si u ndodh të gjitha skuadrave të mëdha, edhe ata e patën një pjesë të fatit në anën e tyre”. “Shpresoj që Juventusi ta fitojë së paku një trofe këtë vit. Titulli i Kampionatit është shumë i rëndësishëm, por duket aq i largët. Ndërsa Kupa e Italisë është një trofe që mund ta fitojmë më lehtë”, ka thënë Gigi për “Sky”.

Secco: Amauri dhe Giovinco do të qëndrojnë

Drejtori sportiv i Juventusit, Alessio Secco, thotë se Amauri dhe Sebastian Giovinco nuk do të largohen nga Zonja e Vjetër. Këto ditë është përfolur për një transferim shokues të Amaurit te Milani, ndërsa sensacioni bardhezi Giovinco lidhet me një këmbim të mundshëm me Antonio Cassanon te Sampdoria. “Ne jemi të kënaqur me performancat e Amaurit dhe ai është i lumtur me skuadrën. Po ashtu edhe Giovinco është lojtar shumë i rëndësishëm për ne, dhe ata të dy do të mbeten”, ka thënë Secco.

Juve kërkon mbrojtësin e Villarrealit

David Silva nuk është i vetmi lojtar nga Primera Divisioni për të cilin është i interesuar Juvetnusi. Mediat italiane njoftojnë se Bianconerët dëshirojnë shërbimet e mbrojtësit të Villarrealit, Diego Godin. “Tuttosport” njofton se Ranieri është duke e përcjellë qendërmbrojtësin e Villarrealit, si edhe mbrojtësin e krahut të djathtë të Valencias, Miguel. Mbrojtja e Juves ka pasur disa probleme për shkak të lëndimeve, ndërsa përveç kësaj drejtuesit bardhezi dëshirojnë ta rifreskojnë mbrojtjen, pasi që Nicola Legrottaglie, 32-vjeçar dhe Olof Mellberg, 31-vjeçar, kanë filluar të plaken.

Iaquinta: Forca jonë është kompaktësia

Sulmuesi juventin ka qenë protagonist në fitoren e ekipit të tij kundër Romës me një dygolësh

Thuhet se ditën e premte në qendrën stërvitore të Romës, Spalletti, ka folur shumë mirë për Vincenzo Iaquintan, të cilin e ka stërvitur në Udine për katër sezone rradhazi. Vlerësimi për lojtarin arrin deri në atë pikë sa do kishte dashur ta kishte me vete edhe tek Roma, dy vjet më parë kur sulmuesi më pas ka kaluar tek Juventusi, por edhe verën e kaluar. Dhe kjo, pavarësisht se i vë në dukje një difekt që për një sulmues është shumë i rëndësishëm. “E vetmja gjë është se shënon pak, ka thënë trajneri. Konkretizon shumë pak. Unë të paktën kështu e kam lënë”. Ndërsa të shtunën në mbrëmje e ka gjetur ndryshe. Nuk i kishte mjaftuar goli, që në kampionatin e kaluar Iaquinta e ka realizuar pikërisht në “Olimpico” në minutat e fundit të ndeshjes kundër Romës. Për t’i mbushur mendjen ish-trajnerit të tij se ka ndryshuar, të shtunën në mbrëmje djali nga Calabria është dashur të shënojë një dygolësh. Jo për t’u hakmarrë, pasi atë e konsideron një mjeshtër. “Më ka dhënë shumë, më ka futur ai në futbollin që ka rëndësi”, ka kujtuar edhe në përfundim të ndeshjes Iaquinta. Por me mjeshtrat, nëse bëhet fjalë për të dhënë leksione, ka më shumë lezet.

KLASIFIKIMI - “Po, jam i lumtur me paraqitjen që kam bërë, por edhe me atë të ekipit. Nuk ishte e lehtë të fitohej këtu. Megjithatë, kemi arritur një fitore të madhe pikërisht sepse kemi qenë kompaktë. Kjo është karakteristika jonë kryesore”. Ai i pari, kur Roma kishte topin, bënte presing dhe ndihmonte edhe mbrojtjen: “Ma ka kërkuar Ranieri, pasi është një gjë që di ta bëj mirë. Mbrojtësit e parë duhet të jenë sulmuesit”. Por jo të gjithë e bëjnë këtë, ndërsa ai që duhet të japë diçka më shumë se të tjerët për të luajtur, po. Në fund, nëse Juventusi nëntë ndeshje nga fundi i kampionatit vazhdon të ruajë hapin ndaj Interit, kjo ka ardhur edhe falë sulmuesit më të “keqtrajtuar” të ekipit. “Po, klasifikimin e shikojmë, ka rrëfyer lojtari, por mbi të gjitha shikojmë veten tonë. Kemi marrë një fitore të rëndësishme kundër Romës, më pas kemi edhe përballjen direkte në shtëpi kundër Interit: duhet të besojmë patjetër. Në “Olimpico” kemi treguar forcën tonë, ne jemi gati”.

FRESKIA - Pasi është ndalur më shumë se një herë nga dëmtimet, me ardhjen e vitit të ri Iaquinta ka merituar hapësirat që prej disa muajsh po i jep Ranieri. I cili duke qeshur ka thënë: “Ka pasur shumë probleme fizike, por tani është i freskët”. Iaquinta vrapon shumë, shënon siç ka bërë kundër Romës ose kundër Chelseat dhe bën të tjerët të shënojnë, ashtu siç ka ndodhur kundër Bolognas kur i ka dhënë një pasim të saktë Sebastian Giovincos. Që të shtunën, pas një sërë kombinimesh që nuk kanë përfunduar siç duhet, kur rezultati ishte 0-0 ia ka kthyer borxhin. Iaquinta është treguar i aftë duke evituar Lorian dhe më pas duke çuar topin në rrjetë me të djathtën në shtyllën e dytë. Më pas kur shifrat ishin 1-1, ka kërcyer më shumë se Mexes dhe ka shënuar me kokë, ashtu si vitin e kaluar, në të njëjtën portë. Ka dhënë edhe një pasim të saktë për Del Pieron. Tashmë, prej kohësh, ai është sulmuesi më rezultativ i Juventusit, si në rolin e sulmuesit të parë ashtu edhe në atë të sulmuesit të dytë.

Ranieri: Kemi mentalitet fitues

Trajneri bardhezi është shprehur i kënaqur me lojën e ekipit të tij në “Olimpiko”

Si më parë më shumë se më parë… I njëjti rezultat me shtatë ditë më parë, katër gola, që nuk janë pak, edhe kundër një Rome me mungesa. Shtatë ditë më parë tredhëmbëshi ka dhënë rezultate kundër Bolognas, në “Olimpico” të Romës prezenca e Iaquintas dhe regjia e Giovincos kanë bërë diferencën. Për kënaqësinë e Claudio Ranierit, të cilit i mungonte një fitore prej shumë kohësh në kryeqytet. Rezultati i fundit 4-1 në Romë në vitin 2005 është arritur nga Fabio Capello. “Kemi luajtur me vendosmërinë dhe ritmin e duhur, e kemi interpretuar në mënyrën e duhur ndeshjen. Roma është një ekip i frikshëm, ne kur kemi pasur probleme me dëmtimet kemi arritur të marrim rezultate të rëndësishëm në Itali dhe jashtë saj. Kemi luajtur me më shumë shpejtësi dhe sens teknik më të lartë”. Një Juventus shumë më lart nga sa pritej. “Duam të japim gjithmonë maksimumin, kjo skuadër ka mentalitet fitues dhe këtë po ia mësoj edhe lojtarëve të rinj, filozofinë e përmirësimit nga dita në ditë”. Iaquinta, sulmuesi i rigjetur. “Eshtë një nga katër sulmuesit tanë që dinë të ndëshkojnë kundërshtarin. Shfrytëzohet për karakteristikat që ka. Kemi marrë Amaurin, sepse ishte ndryshe nga sulmuesit e tjerë që kishim në dispozicion. Do të kisha dashur ta fusja gjithnjë në fushë Vincenzon, por luajnë ata që janë në formë më të mirë dhe ai në të kaluarën ka pasur disa probleme fizike. Ndërsa, tani është i freskët dhe mund të luajë”. Katër pikë diferenca të shtunën, shtatë të dielën. “Nuk është një motivim i shëndoshë të shpresosh që të tjerët të ndalen. Të mendojmë për veten tonë, Interi është ekipi favorit, ndodhet para, nëse ngadalësojnë ose ndalen… Ku i dihet”. Ndërsa Cobolli Gigli: “Herët ose vonë do t’i takojë të gjithëve të ndalen. Dhe ne jemi në pritje për të shfrytëzuar këtë rast”. Në lidhje me formacionin. “Nëse mendoj se do të më japin diçka do të luaj me tre sulmues”. Ranieri shpreson t’i ndryshojë mendimin lojtarit çek lidhur me largimin e tij nga futbolli në fund të sezonit. “Ai ka deklaruar kështu, unë shpresoj që të mos largohet, një si ai i shërben shumë skuadrës. Çdo vit është i pavendosur, ndoshta e bën për të rritur rrogën”, ka bërë shaka trajneri juventin.

Giovinco: Të mbajmë ritmin

Pavarësisht se nuk ka arritur të shënojë në sfidën ndaj Romës, Sebastian Giovinco, edhe një herë tjetër ka zhvilluar një ndeshje të nivelit të lartë. Sigurisht që me “Milingonën Atomike” në fushë, Juventusi i ka dhënë një tjetër ritëm manovrës së saj sulmuese dhe rezultatet janë mëse të dukshme, tetë gola në dy ndeshjet e fundit me Giovincon titullar. Gjithsesi, sulmuesi 22-vjeçar i Juventusit kërkon të qëndrojë me këmbë në tokë përsa u përket paraqitjeve të tij: “Di që kam ende shumë për të mësuar, mundohem të jap gjithmonë maksimumin në fushë dhe shokët e skuadrës më ndihmojnë për këtë gjë. Duke luajtur me vazhdimësi është e natyrshme që kolaudohem më mirë me të gjithë skuadrën, mbi të gjitha me Del Pieron, me të cilin po kombinohemi gjithmonë e më mirë në ndeshjet e fundit”. Sebastian është shumë i karikuar për mundësinë e dhënë nga Claudio Ranieri dhe kërkon të japë kontributin e tij që Juventusi të fitojë diçka të rëndësishme në përfundim të këtij sezoni, pse jo edhe kampionatin mbi të cilin shpreson ende, pavarësisht se Interi me fitoren ndaj Regginas ka rikthyer sërish diferencën prej shtatë pikësh me bardhezinjtë. Ndaj Romës ishte shumë e rëndësishme që të fitonim dhe besoj se i kemi merituar plotësisht tri pikët, ashtu siç tregoi edhe rezultati. Juventusi shquhet për mentalitet fitues, por edhe ne lojtarët e rinj kemi filluar ta kuptojmë qartë se çdo të thotë kjo. Pikërisht për këtë arsye duhet të vazhdojmë të shpresojmë për titullin, në mënyrë që ta mbyllim me një trofe të rëndësishëm këtë sezon të shkëlqyer për ne”, u shpreh Sebastian Giovinco.

Juventusi “acaron” Luciano Spallettin

“Jam pak i acaruar për faktin se kemi humbur 4-1: ka pasur disa situata që nuk na kanë lejuar ta përgatisnim në mënyrën e duhur këtë ndeshje. Kam disa lojtarë në kushte jo të mira fizike”. Ky ka qenë komenti i Luciano Spallettit, për humbjen e pësuar në shtëpi kundër Juventusit. “Në rastin e golit të dytë, një devijim ka nxjerrë jashtë loje Mexesin, ka shtuar ai. Unë jam i zhgënjyer nga rezultati, më vjen keq për publikun tonë dhe për lojtarët. Kundërshtari ishte Juventusi, kishim një arsye të fortë për të dhënë diçka më shumë. Por, Juvja, ka merituar të fitonte dhe ne nuk na mbetet gjë tjetër veçse të punojmë me kokën ulur”. Në fund: “Humbja të dhemb. Përgjigja që kemi dhënë në bazë të problemeve që kemi pasur nuk ka qenë e mjaftueshme. Megjithatë, objektivi ynë mbetet vendi i katërt”. Ndërkohë, presidentja e klubit verdhekuq ka deklaruar: “Shpresoja tek një fitore, por duhet pranuar, edhe pse rezultati 4-1 të dhemb”. Rosela Sensi nuk ka dramatizuar shumë situatën pas humbjes së rëndë të pësuar në “Olimpico” kundër Juves, por nga fjalët e saj, gjithsesi, kuptohet njëfarë shqetësimi për të ardhmen e Romës së saj dhe për objektivin e rëndësishëm Champions Ligë. “Me tri pikët gjithçka është e mundur deri në fund, të shpresojmë. E vetmja notë pozitive kanë qenë të rinjtë e shumtë që kanë zbritur në fushë nga sektori jonë i të rinjve. Ky është një lajm i mirë për ne dhe për të gjithë futbollin italian”.

“Olimpico më sjell fat”

Olof Mellberg, mbrojtësi i Juventusit, tashmë është ambientuar totalisht me skuadrën torineze dhe së bashku me Chiellinin po konfirmohen gjithmonë e më shumë të pakalueshëm në qendër të mbrojtjes. Mbrojtësi suedez, përveç detyrave të tij mbrojtëse është shfaqur edhe si një golashënues i shkëlqyer, mbi të gjitha në “Olimpico”, ku gjatë këtij sezoni ka shënuar dy herë, kundër Romës dy net më parë dhe ndaj Lacios. “Olimpico më sjell fat, pasi të dy golat e mi i kam shënuar pikërisht në Romë, madje në të njëjtën portë. Ndaj verdhekuqve arritëm një fitore të madhe, por të vështirë. Jam shumë i kënaqur nga paraqitjet e mia të fundit, por mbi të gjitha me bashkëjetesën te Juventusi”.

Ranieri i kënaqur me Iaquintan

Trajneri i Juventusit, Claudio Ranieri, ishte i ngazëllyer me dy golat e Vincenzo Iaquintas në fitoren prej 4-1 ndaj Romës. “Iaquinta duhet të shfrytëzohet me karakteristikat e tij. Ne nënshkruam me Amaurin në mënyrë të duhur pasi ai është një sulmues më ndryshe nga të tjerët që i kemi në disponim, andaj jam i kënaqur me mënyrën se si kanë kontribuar të gjithë këtë sezon”, ka thënë Ranieri. “Unë gjithmonë i nxjerri ata me formën më të mirë në fushë. Mbase Iaquinta gjithmonë i ka pasur ato pengesa para se të luajë, qoftë lëndim apo ftohje. Së fundi ai ka këmbë të freskëta dhe mund të kontribuojë shumë në këta muaj të fundit”, ka shtuar trajneri italian.

Nedvedi do të vazhdojë edhe një vit?

Legjenda e Juventusit, Pavel Nedved, ka deklaruar se në fund të sezonit do të heqë dorë nga futbolli aktiv, mirëpo agjenti i tij, Mino Raiola, është i mendimit se klienti i tij do të mendojë sërish për planet e tija të pensionimit dhe se do të bindet për ta rinovuar kontratën me Zonjën e vjetër. “Mendoj se ai do të vazhdojë të luajë dhe mund ta bëjë këtë për shumë vite. Do të bëj gjithçka që mundem, për ta bindur Nedvedin që ta vesh fanellën e Juves edhe sezonin e ardhshëm”. “Ende ekziston shpresa që të ndryshojë mendje. Ai dëshiron thjeshtë të largohet që të lë vend për lojtarët e rinj”, është cituar Raiola për “La Gazzetta dello Sport”.

Zonja e Vjetër shkel Ulkonjën Romake

Kryendeshja e javës së 29-të në Serie A, e zhvilluar në Stadio Olimpico të kryeqytetit italian, ndërmjet Romës dhe Juventusit, ka përfunduar me fitoren e lartë të Zonjës së Vjetër, prej 4-1. Juventus e filloi ndeshjen me pretendimin për ta ngushtuar diferencën e pikëve me Interin, në garën për ta fituar titullin kampion, ndërsa Roma objektiv kryesor ka një pozitë e cila çon në Ligën e Kampionëve në sezonin e ardhshëm. Vlen të përmendet që të dyja skuadrat luajtën në mungesë të shumë lojtarëve të formacioneve bazë. Te Roma emrat e spikatur që mungonin ishin: Totti, De Rossi, Juan, Cicinho, Aquilani, Taddei, Perrota etj., derisa te Zonja e Vjetër, veç tjerëve munguan: Camoranesi, Sissoko, Zanetti dhe Amauri.

Pjesa e parë
Pjesa më e madhe e gjysmës së parë të ndeshjes u zhvillua me një ritëm jo shumë të shpejtë, me pak raste, pasi që skuadrat zhvillonin një lojë të mençur, duke u munduar të mos lënë shumë hapësira në fushë. Megjithatë, Bianconerët arritën që në minutën e 34 ta zhbllokonin rezultatin. Një lëvizje e mirë e sensacionit juventin, Sebastian Giovinco, e gjeti sulmuesin Vincenzo Iaquinta, i cili e mposhti portierin Doni për t’ia dhënë avantazhin skuadrës mysafire, e cila shkoi në pushim me epërsi minimale.

Pjesa e dytë
Porsa filloi pjesa e dytë e ndeshjes (48’), skuadra e Romës barazoi rezultatin me anë të Simone Lorias, mirëpo ky gol vetëm sa i nervozoi lojtarët mysafir. Sulmuesi i Juventusit, Vincenzo Iaquinta, nuk e lejoi të zgjaste shumë baraspesha, pasi e mposhti për të dytën herë Donin në këtë mbrëmje, duke ia dhënë sërish avantazhin skuadrës së tij (55’). Një krosim të bukur të Del Pieros nga këndi, e shfrytëzoi më së miri mbrojtësi shtatlartë i Bianconerëve, Olof Mellberg, i cili me kokë krijoi avantazhin e dy golave për skuadrën mysafire (68’). Goli i katërt i takoi legjendës së Juves, Pavel Nedved, i cili porsa hyri në lojë e përshëndeti portierin romak me një ‘volley’. Me këtë fitore Juventusi mban gjallë shpresat për Scudetto dhe tani është katër pikë prapa Interit që të dielën e zhvillon ndeshjen e javës së 29-të kundër Regginas.

Të dhëna rreth ndeshjes ROMA-JUVENTUS 1-4 (0-1).

Golashënues: 34’ dhe 55’ Iaquinta, 48’ Loria, 68’ Mellberg, 74’ Nedved.
ROMA: Doni; Panucci, Mexes, Loria (62’ Montella), Riise; Felipe, Brighi; Tonetto, Baptista; Menez (82’ D’Alessandro), Vucinic (92’ Stojan). Në dispozicion: Arthur, Crescenzi, Malomo, Brosco. Tarajner Spalletti.
JUVENTUS: Buffon; Grygera, Mellberg, Chiellini, Molinaro; Salihamidzic, Tiago (70’ Nedved), Poulsen, Giovinco (72’ Marchionni); Iaquinta, Del Piero. Në dispozicion: Chimenti, Zebina, Knezevic, Castiglia, Trezeguet. Trajner Ranieri.
ARBITRO: Rocchi di Firenze.
Karton të verdhë: 24’ pt Loria, 29’ pt Tiago, 40’ pt Mexes, 23’ st Loria, 25’ st Molinaro, 33’ st Menez.

Video nga ndeshja (golat)

Amauri: Miccoli është më i mirë se Del Piero

Sulmuesi i Juventusit, Amauri, duket se dëshiron ta humbë simpatinë e kapitenit të Zonjës së Vjetër, pasi që ka deklaruar se ish-partneri i tij në sulm, Fabrizio Miccoli, është më i mirë se partneri i tij aktual, Alessandro Del Piero. Amauri ka kaluar një sezon të shkëlqyer krah ikonës së Juves në sulm që prej ardhjes së tij nga Palermo, mirëpo ai e konsideron Miccolin si lojtar më të mirë se kapiteni bardhezi. “Del Piero? Mendoj se Miccoli është më i mirë. Fabrizio ka kualitete të jashtëzakonshme. Fatkeqësisht lëndimet e tija në sezonin e kaluar, na penguan që të zhvillonim një sezon të shkëlqyer së bashku”. “Mund të them me sinqeritet që Miccolli është lojtari më i mirë me të cilin kam luajtur ndonjëherë”, ka thënë braziliani për Mediagol.it.

Gigli konfirmon interesimin për Cassanon

Pas spekulimeve të vazhdueshme të mediave italiane, presidenti i Juventusit, Giovanni Cobolli Gigli, ka konfirmuar interesimin e skuadrës së tij për sulmuesin e Sampdorias, Antonio Cassano. “Cassano është një lojtar i shkëlqyeshëm dhe Juventusi është duke i përcjellë disa lojtarë të rangut të tij”. “Ne jemi duke kërkuar lojtarin e duhur për ta zëvendësuar Nedvedin, dhe dëshirojmë të investojmë ca para për këtë pozitë”, ka thënë Gigli për “Tuttosport”. Për ta transferuar Cassanon, Juve duhet të paguajë së paku 20 milionë euro, prej të cilave 5 milionë do t’i shkojnë skuadrës së mëparshme të Cassanos, Real Madrid.

Del Piero: Capello më bëri të mendoj për largim

Kapiteni i Juventusit, Alessandro del Piero, thotë se ai e kishte vënë në dyshim të ardhmen e tij me biankonerët derisa ish-trajneri Fabio Capello ishte në detyrë. Del Piero do ta përfundojë karrierën e tij në Juventus, por kishte frikë se mund të largohej kur vazhdimisht lihej në stol nga Capello dhe pastaj klubi zbriti në Serie B. “Jam tmerrësisht i lumtur që qëndrova në Juventus, pasi ky ishte objektivi im primar. Kishte disa gjëra që më shtynin të largohem nga Juve gjatë asaj kohe, por megjithatë gjërat shkuan kështu dhe jam i lumtur”, ka thënë Del Piero.

Riise: Roma mund ta befasojë Juventusin

Mbrojtësi i Romës, John Arne Riise, thotë se ekipi kryeqytetas mund ta befasojë Juventusin në ndeshjen e sotme. “Do të kemi mungesë të shumë yjeve, por megjithatë edhe më tej do të jetë një ndeshje e shkëlqyeshme në mes dy ekipeve”, ka thënë norvegjezi. Giallorosët janë pa yjet Francesco Totti, Alberto Aquilani, Simone Perrotta, Cicinho, Juan, Marco Cassetti dhe Rodrigo Taddei, që të gjithë për shkak të lëndimeve. Po ashtu romakët janë edhe pa katër lojtarë të suspenduar, Daniele De Rossi, David Pizarro, Souleymane Diamoutene dhe Marco Motta. Kjo ka nxitur trajnerin Luciano Spalletti t’i thërrasë gjashtë lojtarë të ekipit të të rinjve, Riccardo Brosco, Alessandro Crescenzi, Marco D’Alessandro, Adrian Stojan, Alessandro Malomo dhe Sebastian Mladen.

Claudio Ranieri: Në Romë për të fituar

“Ju e dini që po zhvillojmë një kampionat të shkëlqyer”. Një përgatitje për mrekullinë. Claudio Ranieri e di që nuk është e vërtetë, por vazhdon të ketë besim. Sot në mbrëmje Roma mund ta ndalojë Juventusin, duke e larguar edhe nga ambiciet për titullin. E rëndësishme për trajnerin është sqarimi i një koncepti të rëndësishëm: “Më bëhet qejfi që disa mendojnë se ne mund të arrijmë gjithçka, thotë Ranieri. E dimë që vetëm një skuadër mund ta humbë, por ne kemi shumë për të ndërtuar dhe për të thënë. Duhet të përmirësohemi vazhdimisht, në të gjitha aspektet. Pastaj nëse dikush do ta humbasë titullin, ne do ta marrim me shumë kënaqësi. Por duhet të jemi realistë”.

MAKSIMUMI - “Vitin e kaluar, nëse Juventusi do të kishte arritur në Evropë, ne do të ishim mjaft të kënaqur, ka vazhduar trajneri i bardhezinjve, pastaj u kualifikuam në Ligën e Kampionëve dhe zhvilluam një punë të jashtëzakonshme. Unë nuk e di në jemi më mirë a më keq se niveli ynë i zakonshëm. Ju e dini që ne po zhvillojmë një kampionat shumë të bukur. Por ne nuk kënaqemi me kaq, Juventusi kështu është. Nuk jemi kurrë të kënaqur me arritjet tona. Asnjë nuk e priste këtë Juventus për dy vjet dhe një meritë të vogël e ka edhe trajneri”.

KLASIKJA - “Do të jetë një skuadër tjetër pa Tottin, por kjo nuk do të thotë se do të jetë më pak e fortë. Ai, si Maldini dhe Del Piero, është një lojtar që të gjithë do donim ta shihnim në fushë. Do të duhet Juventusi më i mirë i mundshëm për të arritur një rezultat pozitiv”. Del Piero, Giovinco, Iaquinta, Trezeguet... Nëse Juve do të provonte tredhëmbëshin? “Tredhëmbëshi është një hipotezë të cilën nuk e mohoj. Por për të ndryshuar modul duhet të jem i bindur që do të marr diçka më shumë. Kam thënë që Giovinco nuk do të luajë? Nuk kam thënë asgjë. Unë do ta mendoj pak kohë përpara ndeshjes. Mendoj se ai është zhbllokuar, ka hyrë në mekanizëm. Fakti që po jeton me shumë presion mbi vete mendoj se po e ndihmon jashtë mase. Ndeshja që zhvilloi kundër Chelseat, ajo gjysmë ore që ishte në fushë, mund të them se qe mjaft e rëndësishme. Dhe me Bolognan u ka treguar të gjithëve se më në fund, ajo forcë që nuk arrinte të shpërthente, doli në pah. Tani mjafton që të rrijë i qetë”.

TREZEGUET – A është vendosur paqja me Trezeguet? “Nuk kisha pse të bëja paqe, nuk jam zënë me asnjeri. Ne flasim gjithmonë. Gjërat e familjes mbeten atje. Trezeguet ka bërë një javë stërvitore, si gjithmonë, të një niveli shumë të lartë”.

Baptista sulmon Juven: Mbrohet nga arbitrat

Sulmuesi verdhekuq ka bërë deklarata të ashpra kundër rivalëve, me të cilët do të përballet në fundjavë

Nuk ka pasur kohë për t’u befasuar nga “aleanca e re” Juventus-Roma, që ka lindur nga sulmet e bëra nga Mourinho, pasi për të rindezur inatet e vjetra midis bardhezinjve dhe verdhekuqve, ka menduar Julio Baptista. Në një intervistë, sulmuesi brazilian ka sulmuar “Zonjën e Vjetër”, duke shpjeguar se “favoret e arbitrave nuk kanë të bëjnë vetëm me zikaltrit. Kam ndjekur katër herë Juventusin dhe kam parë gjëra të pabesueshme”. Më pas se cilat janë “gjërat e pabesueshme”, të cilave u referohet “Bisha” nuk është shumë e vështirë për t’u kuptuar. Sepse, edhe pse nuk i është referuar direkt atij takimi, duket e qartë se Baptista flet për ndeshjen e Bergamos kundër Atalantës dhe për pozicionin jashtëloje të Marchionnit në rastin e golit të parë të bardhezinjve. Ja çfarë ka thënë romanisti: “Një ditë do të dua të kuptoj se si mund të bëhet një gjë e tillë, ka vazhduar ai. Anësori ka qenë një hap larg një lojtari juventin që ishte në pozicion të dukshëm jashtëloje. Topi ka shkuar në këmbët e këtij lojtari në pozicion jo të rregullt dhe gjyqtari anësor nuk ka bërë asgjë. Nuk kam parë kurrë një gjë të tillë gjatë gjithë karrierës sime”. Mbaron me kaq? Jo. Baptista, ndoshta në mënyrë naive, vazhdon drejt në rrugën e tij dhe kritikon të gjithë sistemin e arbitrave italianë, por duke mohuar teorinë e “komplotit”: “Jo, këtë jo, ka thënë ai. Ndryshe do të ishte një skandal i madh. Futbolli nuk do të ishte më një gjë e bukur, por i manipuluar. Sigurisht: nuk kam parë kurrë gjëra të tilla në kampionatet e tjera, por nuk mendoj se gabojnë me dashje. Një gjë është të marrësh një vendim të gabuar në një situatë të vështirë, një gjë tjetër është të bësh gabime kur vendimet janë të lehta për t’u marrë. Ta shpjegoj: nëse një anësor shikon që një lojtar është në pozicion jashtëloje, është në një pozicion të mirë për të verifikuar këtë, pse nuk e ngre flamurin? Sepse, sipas mendimit tim, egziston një farë mbrojtjeje për ekipet e mëdha”. Midis të cilave, natyrisht, për brazilianin nuk është Roma e tij: “Absolutisht, Roma nuk është e mbrojtur, ka përfunduar ai. Përveç faullit me dorë të Mexesit kundër Udineses nuk ka marrë asnjë lloj ndihme”. Për pasojë ka ardhur edhe sulmi ndaj klubit verdhekuq, fajtor që pëson në mënyrë pasive gabimet e arbitrave: “Nuk duhet të jemi vetëm ne lojtarët që flasim për këto gjëra, duhet ta bëjë edhe klubi një gjë të tillë. Roma nuk ka folur akoma, por duhet ta bëjë. Sepse kur ndodhin disa gjëra të caktuara tek Reali i Madridit ose tek Barcelona, flasin të gjithë: skuadra dhe klubi. Nëse nuk je i bindur për gjërat që ndodhin rreth teje, duhet të ndërhysh me një komunikatë. Unë e pres një të tillë”. Këshilla për zonjën Sensi.

Juvja mendon Boneran për krahun e djathtë

Nëse nuk është një “restyling”, edhe pak duhet. Juvja kërkon të “zbukurojë” krahët. Në krahun e majtë, objektivi i parë mbetet David Silva: i shpejtë në zonën sulmuese, spanjolli do të siguronte cilësi në mesfushën e Ranierit. Si mbrojtës i majtë, emri i ri është ai i Andrè Santos, brazilianit 25-vjeçar të Corinthiansit, i cili kërkohet edhe nga Sampdoria dhe Fiorentina, ndërsa për krahun e djathtë pëlqehet Bonera i Milanit, si zgjedhje e mundshme edhe për dy qendërmbrojtësat. Një tjetër hipotezë është edhe portugezi Miguel, që i skadon kontrata me Valencian. Aktualisht ky vend është i çekut Grygera, por për sezonin e ardhshëm, duhet një lojtar më i besueshëm në këtë rol.

Tiago‑Iaquinta: S’dorëzohemi për kampionatin

Shtatë në dhjetë ndeshje. Janë pikët që Juvja kërkon të parakalojë Interin para fundit të kampionatit për një arritje të vështirë, por jo të pamundur. Ky është mesazhi që lëshohet nga Tiago, Iaquinta e Molinaro. “Jemi një skuadër e madhe dhe duhet të vazhdojmë të besojmë te titulli.” Mesfushori portugez është i qartë dhe me pak fjalë: “Është e vështirë, e dimë, por do të luajmë si gjithnjë”. Iaquinta vazhdon: “Duhet të mendojmë për veten tonë, jo për Juven. Në fushë jap gjithnjë gjithçka, ndaj dhe tifozët më çmojnë, dua të qëndroj në Torino edhe vitin që vjen. Trezeguet? Polemikat duhet të qëndrojnë jashtë grupit, sepse të dëmtojnë. Besoj se ai dhe Ranieri do të bëjnë shpejt paqe”.

Salihamidzic: Titullin, sezonin që vjen

Mesfushori boshnjak i bardhezinjve, protagonist javën e shkuar ndaj Bolognas, tregon momentin e tij

Një vit më parë arritëm të tretët, këtë vit ndoshta në vend të dytë, vitin e ardshëm shpresojmë që të fitojmë titullin.” I sinqertë, madje “kristal” si një ujë mineral. Jo rastësisht Hasan Salihamidzic është për të gjithë “Brazzo”, vëlla, që kur u largua nga lufta e Bosnjës, erdhi 15 vjeç në Gjermani, në Hamburg.

- Shtatë pikë nga Interi, besoni apo nuk besoni te titulli?

- Është shumë shpejt për të parë renditjen. Nëse marrim 30 pikë në dhjetë ndeshje, ka mundësi, por në të vërtetë është e vështirë të fitohen të gjitha. Në Bundesligë me Bayernin, kam fituar dy tituj në ndeshjen e fundit, në 2001-in madje me një gol në minutën e fundit, e njëjta gjë në sezonin pasardhës në minutat e fundit, ndaj dhe unë besoj”.

- Të shtunën e shkuar kundër Bolognas frymëzuat shokët: një gol me kokë, një pasim për golin e Del Pieros dhe inisiatori i golit të Giovincos. Cili është sekreti, këpuca me numër 43?

- Meritë e fizioterapistit, qesh, para ndeshjes më sistemoi kaviljen. Duhej një shkundje pas skualifikimit nga Championsi, e kishim moralin të ulët, u dhamë një mesazh tifozëve tanë dhe kundërshtarëve që ne jemi akoma.

- Nesër ndaj Romës luani për titull apo për të mbajtur larg Milanin nga vendi i dytë?

- Luajmë për tri pikët, që mund të vlejnë dyfish nëse dikush rreth nesh ndalon…

- Është më i fortë Ibrahimovic apo Amauri?

- Unë vlerësoj Amaurin që është një sulmues i jashtëzakonshëm, nuk i mungon gjë: driblim, goditje me kokë, shpejtësi, luan për skuadrën. Ibra në vitet e fundit ka qenë vendimtar në skuadrat ku ka luajtur. Amauri në muajt e fundit ka qenë një qendër të një zgjedhjeje të vështirë, se cilën fanellë kombëtareje të veshë. Unë nuk kam pasur dyshime, nuk do ta tradhëtoja asnjëherë vendin tim. Në moshën 18-vjeçare luajta ndeshjen e parë me Bosnjën ndaj Kroacisë. Edhe pse Gjermania më kërkoi, unë zgjodha Bosnjën. Amauri është një profesionist dhe nuk është e vërtetë që vuan apo është i pavendosur. Po jep gjithçka për Juven. Besoj se do të zgjedhë atë kombëtare që do ta thërrasë.

- Mendoni se ka të drejtë Mourinho kur tha: ‘Milan e Roma zero tituj’. Po Juvja?

- Ai tha atë që mendon, por ka folur shumë shpejt. Edhe Interi u skualifikua nga Championsi, por ne kemi akoma mundësi të fitojmë Kupën e Italisë nëse fitojmë ndeshjen e kthimit, por nuk është e lehtë.

- Pasi kaloi zhgënjimi në Champions, çfarë nuk funksionoi?

- Një gol i yni në Londër do të ishte një epërsi e madhe. Ne luajtëm shumë mirë në Torino, por Chelsea është një ekip i madh. Por do të përpiqemi në sezonin që vjen. Dy vjet më parë ishim në Serinë B. Kemi punuar mirë. Vitin e shkuar arritëm të tretët, tani jemi të dytët, ndoshta vitin që vjen… të parët. Ne jemi një grup djemsh të bashkuar, po rritemi. Por dikujt i ka kaluar mosha, Nedvedi për shembull që ka vendosur të largohet nga futbolli. Asnjë nuk i ka kërkuar të ikë apo të tërhiqet nga futbolli. Është një profesionist i madh, fizikisht i përshtatshëm, nuk besoj se do të largohet nga futbolli.

Chiellini dhe Nedved të gatshëm kundër Romës

Përkundër listës së gjatë të lëndimeve, Juventusi ka arritur të menaxhojë rikuperimin e dyve nga lojtarët kryesorë, Giorgio Chiellini dhe Pavel Nedved, para ndeshjes shumë të rëndësishme kundër Romës. Roma dhe Juventus takohen të martën mbrëma në Stadio Olimpico të kryeqytetit italian, ndërsa pas informatave të reja, trajneri Caludio Ranieri po frymon më lehtë. Chiellini iu nënshtrua një ndërhyrjeje të suksesshme kirurgjike në hundë dhe pritet të jetë në formacionin bazë të bardhezinjve, por mund të mbajë maskë mbrojtëse. Ndërsa Pavel Nedved, i cili u lëndua në ndeshjen e Ligës së Kampionëve kundër Chelseat, pritet të kthehet në mesfushë për t’i mbështetur Alessandro Del Pieron dhe Vincenzo Iaquintan në sulm. Juventusi është dëmtuar shumë nga lëndimet këtë sezon, ndërsa përveç lojtarëve të tjerë, kundër Romës mungojnë Amauri, Mauro Camoranesi, Mohammed Sissoko dhe Nicola Legrottaglie.

Gigli: Trezeguet nuk është në shitje

Presidenti i Juventusit, Giovanni Cobolli Gigli, ka mohuar spekulimet e fundit në lidhje me një largim të mundshëm të sulmuesit David Trezeguet, duke thënë se sulmuesi francez nuk është në shitje. “Mendoj se kjo çështje ka marrë fund me deklaratën e Blanc të shtunën. Të gjitha janë vetëm spekulime të mediave. Ai është njëri nga lojtarët tanë kryesorë dhe ai nuk do të largohet nga këtu”. “Jam takuar me Trezeguet të martën. Ai po stërvitej, ndërsa Ranieri po e përcillte. Ne duhet të përqendrohemi te fitoret dhe shpresoj që Trezeguet të stërvitet mirë dhe të jetë në dispozicion të trajnerit kur ai ta ftojë në ndeshje”, ka thënë Gigli për Affariitaliani.it.

Diego: Në fund të sezonit largohem nga Werderi

Pas spekulimeve të shumta për mesfushorin e Werder Bremen, Diego, braziliani ka njoftuar se këtë verë ai do të largohet drejt një skuadre më të madhe. “Mundësitë janë të mëdha që të largohem në verë. I kam kaluar tre vite këtu, ndërsa më kanë mbetur edhe dy të tjera në kontratë. Sido që të jetë, kam pranuar oferta të shumta dhe ka ardhur koha që t’i marr ato seriozisht”. “Tani për tani po mendoj vetëm për Werder Bremenin, ndërsa në maj do të takohem me agjentin tim për të marrë vendimet e duhura”. “Ëndrra ime është që ta fitoj Ligën e Kampionëve dhe e di se me Werderin do të jetë vështirë të ndodh kjo. Janë disa klube të mëdha të cilat më kanë kontaktuar dhe nuk mund të shtirem kinse asgjë nuk ka ndodhur”, është cituar Diego nga “Corierre dello Sport”. Diego ka qenë në formë të shkëlqyer këtë sezon, ndërsa për shërbimet e tij janë të interesuar gjigantët evropianë, Juventus, Real Madrid dhe Inter.

Legrottaglie: Homoseksualizimi është mëkat

Mbrojtësi i Juventusit Nicola Legrottaglie i ka idetë e qarta mbi gjithçka, po edhe mbi homoseksualitetin: “Në ditët e sotme shikohet si një modë, një mënyrë si shumë të tjera për të qenë kundër. Në Bibël është shkruar shumë qartë se, si për meshkujt dhe për femrat, është mëkat - lexohet në autobiografinë e lojtarit. Por mbledhjet e mia të së hënës janë të hapura edhe për njerëzit gei”. Legrottaglie trajton argumenta të rëndësishëm, si aborti, edukata seksuale (”Unë besoj në ruajtjen e virgjërisë dhe në ruajtjen e trupit”), eutanazinë, fekondimin artificial dhe homoseksualitetin.

Menaxheri: Nedved, qëndro edhe një vit

Pavel Nedved ka lajmëruar largimin e tij nga futbolli në fund të këtij sezoni, por agjenti i tij Mino Raiola kërkon t’i ndërrojë mendim. “Do të përpiqem ta bind që të luajë edhe për një sezon - ka deklaruar agjenti. Do të bëj gjithçka është e mundur që në shtator të ketë akoma veshur fanellën e Juves për ta parë të fitojë Champions Ligën me një skuadër më të fortë se këtë vit”. Për Juventusin nuk ndryshon asgjë: në shtator Nedved do të jetë 37 vjeç edhe në rast se do të ndryshonte mendim do të ishte e nevojshme një alternativë e vlefshme që të mund të zëvendësojë denjësisht mesfushorin çek në krahun e majtë.

Del Piero: Do të japim më shumë se 100%

Që Alessandro Del Piero është idhulli i popullit bardhezi nuk është një gjë e re. Numri 10 i Juventusit ndodhej, në fakt, atje bashkë me De Ceglien dhe Chimentin, për një mbrëmje të një klubi tifozësh të Juves. Të gjithë këndojnë, rreth 800 njerëz, që i kanë sytë të drejtuar nga “Pinturicchio”. Alex është i “ftuari i nderit” i mbrëmjes, me gjithë respektin për shokët e tij të skuadrës, dhe ka menduar të bëjë një premtim: “Nuk do të japim 100%, por më shumë. Tifozët tanë e meritojnë dhe duartrokitjet në përfundim të ndeshjes me Chelsean na kanë pëlqyer shumë”, ka thënë kapiteni. Roma është paralajmëruar.

Cobolli Gigli: Trezeguet-Ranieri? Gjithçka në rregull

Presidenti juventin ka konfirmuar paqen midis francezit dhe trajnerit pas polemikave mes tyre

Çështja Ranieri-Trezeguet është mbyllur. Fjalë e presidentit të Juventusit, Giovanni Cobolli Gigli, i cili ka theksuar se “ky argument është zgjidhur nga deklaratat e bëra nga Blanc. Trezeguet stërvitet dhe Ranieri drejton stërvitjen”. Eshtë folur edhe për një sulm të mundshëm të Milanit për Amaurin: “Janë thjesht zëra, është i pashitshëm ashtu si Trezeguet”.

KAMPIONATI I NDARË - “Ne nuk kemi ditur asgjë lidhur me këtë. Nuk jemi informuar nga askush”. Presidenti i bardhezinjve, Cobolli Gigli, ka zbuluar se nuk është lajmëruar më parë nga vendimi i marrë nga presidenti i federatës italiane të futbollit, Antonio Matarrese, për të ndryshuar kalendarin e ndeshjeve që ishin programuar të zhvilloheshin midis të shtunës 4 prill dhe të dielës 5 prill. “Në një moment ku po përpiqemi të riformojmë statusin e Ligës, - ka shpjeguar ai , për një përfshirje më të madhe në marrjen e vendimeve dhe jemi këtu për të punuar për këtë… Kur duhen marrë disa vendime pjesëmarrja e më shumë personave mund të kishte qenë e nevojshme. Do të na kishte pëlqyer sikur të na kishin informuar”.

ÇËSHTJA TREZEGUET - “Më duket se ky argument është zgjidhur nga deklaratat e bëra nga Blanc, ditën e shtunë. Kam parë Trezeguet të stërvitet dhe Ranierin që drejtonte stërvitjen. Mendoj se ne duhet të përqendrohemi tek shfrytëzimi i të gjitha mundësive që kemi në dispozicion për të fituar ndeshjet që na kanë mbetur dhe për rrjedhojë uroj që Trezeguet të stërvitet mirë dhe që të luajë kur Ranieri do të vendosë ta aktivizojë”.

AMAURI - “Janë vetëm fjalë. Amauri është i pashitshëm, është një nga kampionët tanë. Ashtu si Trezeguet. Janë futbollistë të lidhur nga kontrata të rëndësishme me një klub, që do të vazhdojë përpara me ta”.

MERKATO - “Emrat nuk përmenden. Egziston një listë dhe Blanc bashkë me Seccon po punojnë për të. Natyrisht gjëja e parë është të llogaritet edhe fakti se Nedved mund të mos ketë më dëshirë për të vazhduar futbollin dhe duhet gjetur një zëvendësues, dhe kjo nuk do jetë shumë e lehtë. Silva mund të jetë një zgjidhje”.

KAMPIONATI DHE ROMA - “Eshtë një ndeshje shumë e rëndësishme, siç janë të gjitha. Nëse mendojmë për dhjetë ndeshjet e ardhshme ose ne i fitojmë dhe dikush tjetër i humb ose nuk mund të bëjmë gjë tjetër”. Mbi të gjitha duke parë luftën për vendin e dytë që duket se do të zhvillohet vetëm midis Milanit dhe Juves. Ancelotti kërkon ta sigurojë atë pozicion për të qenë i qetë lidhur me të ardhmen e tij. “Më duket - ka përfunduar Gigli, se ka gjithë të drejtën për të provuar dhe ne kemi detyrën për ta ndalur”.

Iaquinta, sulmuesi më i mirë i “Zonjës”

Lojtari i bardhezinjve ka qenë shumë afër largimit në janar, por tani ka qenë vendimtar

Dy muaj më parë Iaquinta ishte shumë afër largimit, sot është befasisht shumë i rëndësishëm për Ranierin. Nuk është vetëm dëmtimi i Amaurit, që ka ndikuar tek rivlerësimi i atij që në fillim të sezonit konsiderohej sulmuesi i katërt i Juventusit. Eshtë edhe çështja Trezeguet, dhe krahasimi midis dy sjelljeve të kundërta shkon i gjithi në favor të italianit: në stol ka qëndruar shumë, është një kampion bote, megjithatë ka mbetur gjithmonë jashtë fushës. Por mbi të gjitha është edhe rendimenti i tij, i mbështetur edhe nga gjendja e mirë fizike: deri tani në 2009-ën është sulmuesi më i mirë Juventusit dhe me golin e shënuar në Champions kundër Chelseat ka qenë i vetmi, që ka mbajtur gjallë shpresat për një kualifikim të mundshëm. Amauri dhe Del Piero kanë shënuar më shumë, por edhe kanë luajtur më shumë: mesatarja më e mirë e golit është e tija. Tifozët e adhurojnë, Ranieri e shtrëngon fort. Eshtë rikthimi pas një faze të parë jo shumë me fat. Që prej vitit të kaluar ka qenë zëvendësuesi i Trezeguet, Iaquinta jo vetëm ka parë të vijë një sulmues tjetër si Amauri, me të cilin ndër të tjera ka gjetur menjëherë mirëkuptimin, por ka pësuar një sërë dëmtimesh të pabesueshme rradhazi. Me Iaquintën titullar, Juventusi ka fituar gjithmonë në kampionat. Dhe tani që Amauri është jashtë loje, që Trezeguet është i pakënaqur dhe Del Piero ka humbur pak vazhdimësinë, Ranieri beson tek ai për ndjekjen e dëshpëruar ndaj Interit. Iaquinta më në fund ka mundësinë e tij dhe kërkon ta shfrytëzojë në maksimum. Ndërkohë ka marrë rezultatin e parë: Juventusi po rivlerëson idenë për ta shitur në fundin e këtij sezoni. Eshtë folur për Napolin, për të arritur tek Hamsik, por në Torino kanë kuptuar se sa i rëndësishëm mund të jetë një sulmues si Iaquinta.

Drejtuesit juventinë përgënjeshtrojnë zërat

Zërat e fundit që shohin Amaurin, por edhe David Trezeguet me valixhe në dorë drejt Milanit, kundërshtohen pak ashpër nga drejtuesit juventinë, “hiqni duart nga Amauri dhe Trezeguet!”. Një deklaratë e tillë vlen jo vetëm për kuqezinjtë, por edhe për cilëndo skuadër që është e interesuar për dy të sipërpërmendurit. Kundrejt ofertave për dy prej kampionëve, aspo më saktë kolosëve të sulmit të “Zonjës së Vjetër”, presidenca bardhezi u premton tifozerisë së saj se nuk do të tundohet kundrejt asnjë oferte. Një gjë të tillë e konfirmon drejtori i përgjithshëm i bardhezinjve, Jean-Claude Blanc. “Amauri është i pashitshëm. Do të qëndrojë me ne me 1000 për qind, edhe pse ka një kontratë e cila skadon në vitin 2012. E njëjta gjë vlen edhe për David Trezeguet, ashtu sikundër për të gjithë lojtarët, që aktualisht janë pjesë e Juventusit. Ashtu si të gjithë ju e dini, ne po ecim në bazë të një projekti të filluar dy vite më parë dhe padyshim që Amauri dhe Trezeguet janë pjesë e tij. Pikërisht për këtë arsye, këshilloj të gjitha skuadrat që janë të interesuara për ta, të mos trokasin kot në dyert tona për ta, sepse asnjë lloj oferte nuk do të na tundojë. Ne besojmë te kampionët tanë dhe nuk kemi ndërmend të humbasin asnjë prej tyre”. Duke u qëndruar deklaratave të drejtorit të përgjithshëm të Juventusit, Adriano Galliani me shokë duhet të heqin përfundimisht dorë nga ëndrra për të parë, të paktën njërin, Amaurin apo Trezeguet, me fanellën e Milanit në sezonin e ardhshëm.

Milani bën pazar te Juventusi, do njërin mes Amaurit e Trezeguet

Dy sezonet e fundit, katastrofikë për kuqezinjtë, gjatë të cilëve nuk kanë fituar asgjë (vjet), dhe siç deklaroi Mourinho, “që me shumë mundësi edhe këtë vit do ta mbyllin me zero trofe”, nuk janë në ADN-në e një klubi si Milani. Pikërisht për këtë arsye, drejtuesit e shoqërisë milaneze janë gati të godasin fort në merkaton verore për të forcuar maksimalisht skuadrën, me të cilën, në sezonin e ardhshëm do të synojnë të gjithë trofetë e mundshëm, ku spikasin padyshim kampionati dhe Liga e Kampioneve. Emrat në axhendën e Adriano Gallianit, numrit dy të Milanit, nuk mungojnë, por dy prej tyre, të dy juventinë, janë ata që tërheqin më tepër vëmendjen e sportdashësve. David Trezeguet dhe Amauri. Dy sulmuesit e skuadrës së Claudio Ranierit janë dy objektivat kryesorë për të forcuar repartin e avancuar të ekipit të Carlo Ancelottit. Francezi është prej shumë vitesh objekt dëshire i presidentit dhe njëkohësisht kryeministrit italian, Silvio Berlusconi, saktësisht që në periudhën kur “Trezegol” aktivizohej në skuadrën e Monacos. Por atëherë, Moggi me shokë u treguan më të shpejtë dhe ua “vodhën” kuqezinjve transalpinin. Gjithsesi, tentativat për të afruar në Milano David Trezeguet nuk kanë munguar as në vitet e fundit, veçanërisht tri vite më parë, kur Juventusi u detyrua të luante për një sezon në Serinë B italiane. Gjithsesi, sulmuesi francez iu bashkua senatorëve të tjerë si Del Piero, Buffon e Nedved, dhe së bashku ringjitën Juventusin në elitën e futbollit italian. Por ajo që ka rindezur këto zëra janë shkëndijat e fundit mes tij dhe trajnerit Claudio Ranieri, pas zëvendësimit të francezit në sfidën e Ligës së Kampioneve kundër Chelseat në Torino. Trezeguet ka një kontratë me Juventusin deri në vitin 2011, por aktualisht vlera e kartonit të tij vlerësohet nga 13-15 milionë euro, duke marrë parasysh moshën 31-vjeçare dhe përfitimet e larta ekonomike që ka. Ndërkohë, Amauri është padyshim sulmuesi që ka mahnitur më shumë Serinë A në tri vitet e fundit. Në dy të parat ka marrë për dore skuadrën e Palermos, duke e rikthyer klubin sicilian pas shumë vitesh në Kupat Evropiane (Kupën UEFA). Transferimi i tij tek Juventusi u krye për shifrën rekord të merkatos së kaluar italiane prej 28.6 milionë eurosh. Historia e Amaurit është pak a shumë e ngjashme me atë të Trezeguet, pasi edhe Milani dukej fare pranë mbylljes së marrëveshjes gjatë merkatos së shkuar verore, por Maurizio Zamparini, presidenti i Palermos, kishte arritur përpara kohe një parakontratë me juventinët, kështu që braziliani përfundoi në Torino. Gjithsesi, Galliani këmbëngul për t’i shtuar në krah një sulmues brazilian të fuqishëm si Amauri, Kaka'së dhe Patos. Sepse, sipas tij, do të ishte ky sulmi më i fortë i Serisë A, por gjithashtu edhe ai evropian. Ish-sulmuesi i Palermos ka një kontratë deri në vitin 2012 me Juventusin dhe sigurisht që bardhezinjtë nuk kanë aspak ndërmend ta shesin Amaurin, vetëm nëse Milani,

Juvja në dyshim, të shesë kampionët apo jo?

Drejtuesit bardhezinj janë përballë një dileme. Të besojnë tek senatorët apo të rinovojnë ekipin

Peter Kelder rrëfen në librin e tij, “Pesë tibetanët”, sekretin antik të burimit të rinisë. Mund të ndërhyhet psikologjikisht dhe fizikisht ndaj proçesit të plakjes, duke praktikuar pesë rite. Duket se ky tekst është shfletuar edhe në dhomat e zhveshjes së bardhezinjve, mbi të gjithë nga lojtarët simbol të Juventusit, ata që janë afër fundit të karrierës. Buffon, Camoranesi, Del Piero, Nedved, Trezeguet kanë fituar shumë, kanë pranuar sfidën e serisë B pas skandalit të verës së 2006-ës. Kishin dëshirë të fitonin Champions Ligën në vitin e parë të rikthimit të tyre në Europë, por ky sezon ka qenë i mbushur me pengesa. Mosha, dëmtimet, që për disa kanë ndikuar tek rendimenti i tyre, rrezikon të peshojë shumë tek fati i kampionëve, aq sa mund të kushtëzojnë zgjedhjet, që mund të bëjë klubi në të ardhmen. Në shtëpinë e Juves është momenti i dyshimeve: të besojnë akoma tek “të palodhshmit” në sezonin e ri, duke lënë në stol talente të mundshme apo të investojnë, duke shfrytëzuar milionat që mund të vijnë nga shitja e lojtarëve të rëndësishëm?

40 MILIONË - Gigi Buffon, 31 vjeç, është më i riu i pesëshes historike, më i kërkuari në merkato. Milan, Inter, Manchester City dhe United, Barcelona: ofertat në të kaluarën nuk kanë munguar, dhe as do të mungonin nëse SuperGigi do të vendoste të ndryshonte ambient ose nëse do të vinte një ofertë e parezistueshme. 75 milionët e ofruar nga City verën e kaluar janë një kujtim i largët. Kriza ka goditur edhe futbollin dhe i sugjeron veprime të matura edhe pasanikëve të Premier Ligës: 30-45 milion euro vlera aktuale e portierit. Problemet muskulare dhe shqetësimet në shpinë kanë kushtëzuar fazën e parë të sezonit, Gigi akoma nuk është në maksimum.

LAMTUMIRË - Nëse portieri më i mirë i botës do të sakrifikohej në merkaton e ardhshme, paketa milionere (që do të kishte edhe 30 milion të vëna në dispozicion nga bordi drejtues i klubit) do të investohej për të marrë zëvendësuesin e Nedvedit, një mesfushor dhe një mbrojtës. Enigma më e vështirë për t’u zgjidhur ka të bëjë me trashëgimtarin e Pavelit. Mesfushori çek ka bërë të ditur se do të largohet nga futbolli i luajtur në qershorin e ardhshëm në moshën 36 vjeçare, por akoma nuk është thënë fjala e fundit. Emrat për pasardhësin e tij janë të shumtë, nga Ribery tek David Silva dhe Sneijder. Dëmtimet e shpeshta të Camoranesit, këtë vit pothuajse nuk ka qenë asnjëherë në dispozicion, ndërhyrja e dyfishte kirurgjike e Trezeguet, janë zile alarmi që klubi ka ndërmend t’i monitorojë në prag të një zgjedhjeje kurajoze. Në këtë rast ofertat nga merkato mungojnë, për faj të moshës dhe rrogave të larta, 15-20 milion janë shumë. Mbetet për t’u zgjidhur edhe enigma Del Piero. Kapiteni, në 16 vitet e fundit, ka lënë pas shumë konkurentë të rëndësishëm. Me magjitë e tij në fazën e parë të sezonit ka mbajtur Juven në garë si në kampionat ashtu edhe në Champions, duke vuajtur pak lodhjen me ardhjen e vitit të ri, por fizkisht mbahet akoma. Mbas krahëve të tij Cassano do të rrezikonte të pësonte të njëjtin fund si Giovinco. Deri në momentin që “Pinturicchio” nuk do të nxjerrë flamurin e bardhë, do të jetë prijësi kryesor i sulmit bardhezi.

Khedira-Tassi, talentet e rinj bardhezi

Vizitat e shpeshta të Juves në Sttutgart për Fernando Meiran, kanë bërë që drejtuesit bardhezi të “zbulojnë” dy talente të rinj. Sami Khedira dhe Serdar Tasci. Khedira mesfushor dhe Tasci mbrojtës, janë të dy 22-vjeçarë, por kanë eksperiencë në Bundesligë, ku kanë fituar kampionatin në vitin 2007-të. Khedira, me origjinë nga Tunizia dhe Tasci nga Turqia, janë ndër lojtarët më të rëndësishëm të kombëtares së të rinjve të Gjermanisë Under 21 dhe emrat e tyre janë të pranishëm në listat e shumë klubeve të Europës. Edhe pse kontrata e tyre skadon midis viteve 2010-të dhe 2011-të. Khedira, pothuajse një metër e nëntëdhjetë i gjatë, preferon të luajë para mbrojtjes, por dhjetë golat e shënuar dëshmojnë për një orientim të mirë në fazën sulmuese. Ndërsa, Tasci, mbulon krahun e djathtë në qendrën e mbrojtjes dhe bashkë me Ariaudon mund të jetë i riu që mund të rritet për të zëvendësuar Legrottaglien dhe Mellbergun. Nga Anglia, ndërkohë, përmendet gjitnjë dhe më shumë emri i Florent Maloudas, që pas trasferimit të Hiddinkut tek Chelsea ka luajtur si titullar vetëm dy herë. Për mesfushorin e krahut, i cili mund të jetë pasuesi i Nedvedit, flitet për një ofertë rreth 12 milion euro për ta çuar në Torino këtë verë.

Trezeguet te Milan, Seedorf te Juventus?

Sipas Calciomercatonews.com, Juventusi dhe Milani janë duke shqyrtuar mundësinë për të bërë një këmbim të David Trezeguet dhe Clarence Seedorf. Sulmuesit francez nuk po i shkojnë mirë gjërat me trajnerin e Juventusit, Claudio Ranieri, për shkak të disa kritikave që i ka bërë Trezegol në media, prandaj duket shumë pranë largimit nga Torino. Ndërkohë Milani ka nevojë për një qendërsulmues klasi si Trezeguet, duke llogaritur lëndimet e vazhdueshme të Marco Borriellos, prandaj Rossonerët me dëshirë do ta sakrifikonin mesfushorin Clarence Seedorf, për të fituar shërbimet e francezit.

Diego dëshiron Realin e Madridit

Fantazisti akltual i Werder Brmenit, braziliani Diego, është shprehur se çdo futbollist do të dëshironte të luante me Realin e Madridit. Mesfushori i skuadrës gjermane mendohet se do ta braktisë Bundesligën gjatë merkatos së verës. Juventusi është vënë prej kohësh në gjurmët e tij, gjithsesi asgjë nuk është vendosur. Nga deklaratat e vetë lojtarit kuptohet se dëshiron të luajë me bluzën e Realit. Në një intervistë për gazetën gjermane De Welt, Diego ka folur për mundësinë e lëvizjes në kampionatin spanjoll. “Sigurisht çdo futbollist, duke përfshirë edhe veten time, do të dëshironte të bënte pjesë në skuadrën e Realit të Madridit, pasi lufton në çdo moment për trofe, në Spanjë dhe në Europë. është një klub i madh, me shumë histori” - është shprehur Diego. Brazilini e ka nisur karrierën ne Europe me Porton, për t'u transferuar në vitin 2006 te Werder Bremeni. Pas tri viteve në Bundesligë, duket se ai nuk dëshiron të qëndrojë më shumë në Gjermani.

Juventus përgatit 11 milionë funte për Malouda

Mediat angleze përcjellin se Juventusi është duke përgatitur 11 milionë funte për shërbimet e anësorit të Chelseat, Florent Malouda. The Sun ka shkruar se Zonja e Vjetër ka vendosur të kërkojë shërbimet e francezit, duke rënë në kontakt me agjentin e tij. Gazeta shkruan se juve dëshiron që Malouda të zëvendësojë çekun Pavel Nedved, i cili pritet të heqë dorë nga futbolli në fund të sezonit. “Jemi duke shikuar çdo mundësi dhe Malouda është lartë në listën tonë. Le të shohim çfarë do të ndodhë deri në fund të sezonit”, ka thënë një burim brenda klubit italian. Me largimin e Luis Felipe Scolarit dhe ardhjen e Guus Hiddink, 28-vjeçari ka bërë vetëm dy paraqitje si fillestar, dhe do të shohë çdo mundësi të largimit nga Stamford Bridge. Ai arriti në Chelsea nga Lyoni në vitin 2007 për një shumë prej 13.5 milionë funte.