John Elkann: “Amauri do të jetë Ronaldinho ynë”

Pas dy vitesh të vështira, mes kritikave e polemikave, Juventusi i madh po rilind. Dhe prova më e mirë për këtë ishte barazimi, por mbi të gjitha loja e shkëlqyer e torinezëve në miqësoren e “Old Trafford” kundër kampionëve të Evropës, Manchester United. Një gjë të tillë e ka konfirmuar edhe padroni i skuadrës së Juventusit, John Elkann, nipi i avokatit të famshëm, Agnelli: “Jemi shumë të kënaqur nga paraqitjet e fundit të skuadrës sonë. Kjo ka ardhur edhe si rrjedhojë e një fushate të shkëlqyer në merkato, ku Amauri, Ekdal e Poulsen janë ambientuar menjëherë me shokët e rinj të skuadrës dhe janë gati të japin kontributin e tyre me fillimin e sezonit të ardhshëm. Besoj se sulmi do të jetë pika jonë më e fortë. Amauri ka shkëlqyer në këto paraqitje të para, madje duke shënuar edhe gola spektakolarë. Nëse Milani ka arritur të sjellë në ekip Ronaldinhon, atëherë Amauri do të jetë ‘Dinho’ ynë”.