Blanc: Juvja ka një të ardhme të madhe

“Juventusi është një skuadër tepër e fortë dhe në të ardhmen do të jetë edhe më e fortë se tani.” Jean-Claude Blanc, i cili foli për dy vitet e para të punës së tij te bardhezinjtë, ndihet tepër optimist. Administratori i deleguar i bardhezinjve e parashikon të ardhmen gjithnjë e më pozitive. “Vijmë nga dy sezone shumë të vështira, por tashmë për fat të mirë i kemi lënë pas. Cili është kujtimi më i keq? Fakti që u detyruam të linim të largoheshin disa kampionë të mëdhenj. Por ishte absolutisht e nevojshme.” Por ai nuk kishte si të mos i lavdëronte “të gjithë ata që qëndruan dhe që ende sot përbëjnë boshtin e skuadrës. Janë ata çelesi i kualifikimit në Ligën e Kampioneve dhe duhet t’i falenderojmë edhe për këtë”, - tha Blancu. Programi që përpunuan fillimisht drejtuesit e rinj ishte 5-vjeçar. “Jemi në mesin e rrugës. Po luftojmë në dy fronte, në kampionat dhe në Champions. Kemi një skuadër të kompletuar dhe cilësore. Jam i sigurt se do të jetë një Juve zbavitëse dhe tërheqëse,- ka vijuar ai. - Dhuna në futboll? Në radhë të parë lipset respekti. Në Firence drejtuesit e Juventusit e panë ndeshjen krah për krah me ata të Fiorentinës. Është kjo klima e duhur që duhet të krijohet: drejtuesit janë të parët që duhet t’i japin shembullin tifozëve.”