Del Piero i vendosur për fitore

Legjenda e Juves, Alessandro Del Piero, ka folur për ndeshjen e mbrëmjes së sontme kundër Zenitit, duke pohuar se mezi pret ta shkelë sërish ‘skenën’ e madhe evropiane. Bardhezinjtë sonte mbrëma janë nikoqirë të fituesve të Kupës Uefa dhe Superkupës së Evropës, Zenit St Petersburg, në Stadio Olimpico të Torinos. “E njoh Zenitin, i kam parë në UEFA dhe në ndeshjen për Superkupë. Ata kanë lojtarë shumë të mirë me aftësi të shkëlqyeshme teknike”. “Kam emocione të mëdha për këtë ndeshje, ndërsa pjesëmarrja jonë në Ligën e Kampionëve ka rëndësi të madhe për ne, dhe kjo është një garë e jashtëzakonshme ku është nder të jesh pjesë e saj”. “Ky nuk është fillimi për ne. Ne kemi shumë përvojë në këtë garë dhe do të garojmë kundër çdo kundërshtari”. “Duhet të jemi gati. Zeniti nuk është një skuadër e vogël dhe ne duhet të jemi të kujdesshëm. Ata janë shumë konkurrues dhe kompakt, prandaj ne do të kemi nevojë për fat dhe përkushtim”, ka përfunduar ikona bardhezi.